BAKIT KINSE?

Ako ay kinse anyos ng unang ma-in-lab sa aking kaklase na si Teresita, sabi nila pers lab never dies, pero hindi sya ang aking napangasawa.

Kinse anyos pa lang ako ng unang mapasabak sa pag-inom ng kinatatakutang gin bulag at pulutang sitsaron. Ito rin ang taon na ako ay naguguluhan sa aking sarili na tila gusto mong malampasan agad ang adolescent stage upang malayo kong magawa ang mga pantasya ko sa buhay at maisakatuparan rin ang aking mga pinapangarap. Sa edad kong kinse rin sumikat ang Pinoy Rock na pinangungunahan nila Mike Hanopol, Joey Smith, Sampaguita at Maria Capra. Ito ang panahon ng talamak na bentahan ng marijuana sa mga kalye Pasay.

At ngayon, kinse anyos na akong nagtatrabaho bilang isang OFW. Malaking bahagi na rin pala ng aking buhay ang ginugol ko dito sa ME. Kaya’t sa pagkakataong ito, nais kong bigyan ng puwang sa aking blag sa pagbabalik tanaw sa aking nakaraan, kasalukuyang kaganapan at pananaw bilang migrante upang maibahagi at makapaghatid sa inyo ng mensahe sa tunay na buhay ng OFW sa aking katauhan at sa katauhan ng aking kapwa OFW na tinaguriang bagong bayani ng bansa.

KINSE anyos ang lumipas, Enero 21, 1992, ang petsa ng aking lisanin ang Maynila patungong M.E. upang hanapin ang aking kapalaran, samahan ninyo ako sa aking paglalakbay sa nakaraan.